MY VALENTINE'S - 14

MY VALENTINE'S

Hk Renthlei

Eps - 14


Thlantla hluama ka harh chuan ka nu chu ka kiangah awmin min lo en reng a.

"Ka mumang a ni chu ka van lawm tak em!" tiin ka thaw huai huai mai.

"Mangchhia i mang a ni maw? Enge i hmuh reng reng a, i rum nasa lutuk a, ka rawn kaitho ringawt che alawm," a tih chuan makti zetin ka en a.

"Ka rum chhuak amaw?" Ka ti let ha a.

"Umm, i țe țhawt țhawt bawk a," a tih leh chuan ka mang kha ka hrechhuak leh a, ka zak chu ka sen ap ap mai.

"Ka mangah Zomuana nen bike in kan lo accident a, Zomuana kha truck in a chil hman lo hlauh a, thisen a chhuak nasa lutuk a, ka mangang lutuk ka au nasa lutuk a, chu chu ka lo rum chhuak anih dawn chu," ka ti ringawt. Ka manga Zomuana nen hmangaihna kan chendun dan te kha sawi chhuah chi pawh ni nghal lo chuan...

"Khai aw..!  I mumang a ni hlauh chu a tihzia kher mai." Tih pahin ka nu chu room ațangin a chhuak ta a.

Keipawh ka tho ve nghal vat a, ka nu nen rawng kan bawl dun a, ka mumang kha ka rilruah a lo lang leh țhin a, ka ngaih a țha lo ang reng khawp mai.

Chaw ei khama Zomuana rawn kal chu maktih hmel deuh hian ka lo en vat a. "Engvanginnge khati khan min en vak kher a?" A ti a.

"Engmah ni lo ve," ka ti mai a. Ka melh leh zuk zuk țhin avang chuan ngaih țhatloh hmel zet hian min en kur a.

"Ka pi, Hlute i hian enge a hriat a? Min melh ang zuk zuk a, țap tur hmel ala pui zui," Ka nu hnenah chuan nui pah deuh hian a ti a.

"Umm, nizan a mangah ilo thi ani awm a, chuvang chu aniang, ka ve en chuan alo rum nasa mai a, ka kaiharh phah ringawt alawm," ka nu'n a tih chuan Zomuana chu a lo nui hawk mai.

"Khai a, hei ka thih loh hi mawle, ngaih i ti țhalo zo vek dawn alawm, vawiinah engemaw entir tur che ka nei ka tih kha mawle," a tih chuan ka lo meng kawk mai. Nizan ka manga thil thleng ang kha chu a thlen loh hram ka beisei.

"Vawiin chu kan chhuak lo thei mai lovem ni?" Hlauthawng aw deuh hlek hian ka ti a.

"Engemaw i hriat le? Engmah a thleng lovang. Mumang mai mai a nih kha, insiam thuai rawh, kan tlai zel a nia," a tih chuan ka room panin phur lo zet hian ka insiam ve ta mawlh mawlh a.

Ka chhuah leh hnuah, "Hlauthawng suh, fimkhur takin ka khalh dawn alawm, bakah bike ka rawn keng lo hrim hrim," a tih chuan thawk khatin ka thaw huai thei mai.

"Ka pi, kan rei lovang," tih pahin a motor ah chuan min luhtir a, amah pawh țhu lut ve nghal thuaiin, a tlanchhuak ta a. Kan tlanchhung zawng chuan awm nuamin ka awm thei lo.

"Kan thleng ta," Hlauthawng takin ka hawichhuak a, in pakhat gate chhungah kan lo tlanlut reng tawh a lo ni a, chu in chu ka manga ka hmuh nen khan a inang hauh lo mai. Engvanginnge ka manga mi nena inang tura ka ngaihtuah rikngawt le! Kei hi ka diklo tawp mai. Hlauhthawnna ka ngah lutuk a ni e.

"Lut ila," min rawn en pahin a ti a. Ka darah kuahin inchhung lam min panpui ta a. A kut ka dara a nghahna chuan min tihahdam sawng sawng thei hial mai.

Inchhungah chuan engkim a awm sa nghal vek a. Duhthusama mawi leh nalh, chên chakawm hliah hliah a ni ringawt mai. Mahse ina kan let leh hma chu hahdam takin ka awm thei lo a ni.

"Thingpui i duh em? I hmel a dik lo tlat." A ti a.

"Duh lo mai ang, min hrethiam la, in lamah let leh tawh mai ang, ka awm a nuam thei hlawl lo." Ka ti ta tawp a.

"Anih leh i awm a nawm hlawl loh chuan let tawh ila a ni mai alawm," tih pahin pawnah kan chhuak ta nghal a.

Motora chuangin kan haw leh ta a. Kawng kan tlan chhung chuan ka inveng reng hi a ni ringawt. "Tlan chak suh aw," ka ti deuh reng mai.

Engmah buaina tawk lovin in kan thleng leh ta hlawl mai chu ka thaw nghal ham ham mai. Ka inhumruh nasat zia chu ka kutphah ka hum na thei vek alawm.

"Kha maw! Țul lovah i intihah vak a nih kha. I ngaihtuahna țha lo zet kha dahbo hmak rawh. Nangmah i intihah mai mai a ni e, Sweety," a ti leh sup a.

"Ni e, ka tihpalh, keimah vangin vawiin kan hun hman a khawlo vek a, pawi ka ti lutuk, chawlh hahdam ka mamawh rih ani ang e."

"Ni e, i chauh hmel tlat. Keipawh ka haw phawt ange, zanlam pawh ka rawn lang lovang. Awm hahdam hram hram tum ang che, kan inneih hunah i chau lutuk palh ange," ka hmuiah a rawn fawp zauhva, a tlan chhuak ta nghal a.

Keipawh inchhungah ka lut ve nghal thuai a. Ka lu te hi a na ut ut in ka hria. "In va lo haw hma ve a, khawiahnge Zomuana?" a tih chuan, "A lo peng ta lo mai," ka tih chuan a bu nghat a.

"Nu, ka lu a na riau mai, ka mu mai ange aw...!"

"Nachhâwkna kha ei phawt la."

"Awle," tih pahin nachhâwkna ka hmawm a, ka room panin ka kal ta nghal a. Inthlak pawh inthlak peih lovin ka mu nghal tawp. Ka lu chu a hma ai pawn a na tawh zawk alawm le, Muhil vang vang ila, a reh mahna le!

Reilote ka muhil emaw ka tih chhungin ka harh meuh chuan khua a lo thim vek tawh. Ka nute'n min kaitho duh lo a ni ngei ang. Ka lu na pawh a reh hawk alawm. Vawiin ni ang renga hlauhthawnna ka neih kha ka la hre ngai lo. Ka mood a off vek.

Zomuana pawh ka tihrilhai vek alawm, ka inthiam lo kher mai. Biak tumin ka phone ka han on a, miscall leh Message a lo awm nual mai. Ka han en chuan Zomuana miscall a tam ber a, a message nen. A message ka hawng vat a, ka țhat leh țhatloh bakah min ngaihthu a sawi chuan ka nui sak mai. Hepa ka hmangaih zia hi chu. Ani pawhin min hmangaih tih ka hai bik lo. Keimah avanga kan hun hman khawlo chu pawi ka ti ve takzet a ni. Tunah chuan ka zia tawh khawp mai, tiin message ka thawn let ve vat.

A rawn call rang kher mai. "I țha deuh chu a lawmawm kher mai. Min timangang hman alawm." A rawn ti halh a.

"Ka thlen ațang khan ka muhil char char a, tunah chuan ka zia tawh tak ka ni. Chaw kan ei ve phawt ange, nakinah kan inbe leh dawn nia," tih pahin phone ka off ta nghal a.

Chaw min lo eisan vek tawh a, mahnia ei chu ka hreh kher mai. Chaw ei ka siam sawk sawk a, ka nu'n min lo puih a tum chuan, "Ka insiam mai ang, lo țhu zawk rawh, nge ila ei lo em?" Ka ti a.

"Ei tawh e, ka lo vil ang che, mahnia ei nuam i tih loh hmel em mai."

"Nia, ka hreh deuh hlek a, ei ve leh tho la."

"Ka puar tawh em mai. Nangmah khan puar takin ei rawh."

Ka ei peih loh tehreng nen rinaiin ka eitui ta phian a. Ka eikham ka tihfel hnuah school kan la chawl bawk nen, tihtur a awm lo kher mai. Ka nu ina awm ning lah a leng daih bawk si. Chhuat ka nawh lai takin, ka phone a rawn ri a, ka han en chuan Akima alo ni a, "Hello" ka pick nghal vat.

"Ka rawn kal mek ania, in inah ka rawn thleng dawn," tehtawp chuan â!

"I rawn thlen duh leh duh loh ani mai alawm," ka ti a.

"Duh chiang e mawle, ka ngai tawh lutuk che a, hmu tur che in ka rawn kal tawp a nih hi."

"Wow! Min ngaih tak tak pawh ka ring love!"

"Rohluzual, vela che, induh viau lo mai teh, ka rawn thlen hunah i chak lo viau ang aw," a nui hak hak a. Hmana Akima kha a ni leh tawh a ni tih ka hriat chuan ka lawm kher mai.

"Awle, rawn thleng phawt la, kan la hre mai dawn alawm,"

"Ka rawn thleng țep tawh. Lunglei ka rawn lut tawh ania."

"Chutianga hmaa rawn thlen tum te chu lo sawi lawk tur che alawm, ropui takin ka lo hmuak tur che ania," tih pahin ka nui hawk hawk a. Lehlam ațanga chek ri hlak ka hriat chuan ka nuih a za zual sauh. Hepa hi chu tihluih hi a nuam țhin.

"Ka rawn thleng țep tak tak ania, rawn țhawn thut che chu ka tum ngei alawm, mahse ka hrilh leh ta mai che anih hi. Ka kâ hi a kaw ve bawk si a," a tih chuan kan nui dun hak hak mai.

Phone a dah hnu pawhin keimahin ka la nui var var mai. Min hmutu chu awm se, a â em ni le, min ti ngei ang. Ka chhuatnawh chu ka chhunzawm leh nghal a. Akima chu ka hmu chak ve reng, mahse ka chunga a rilru putdan avang khan hmuh ka chakna aiin ka huphurhna a nasa zawk.

Chhun chawlh hma in Akima pawh a lo thleng nghal mai bawk. "I va tlan chak awm ve a," ka ti ringawt.

"Zingah ka lo chhuak alawm, ka ngai tawh che a," a ti luam mai.

"Huh! Dawthei lutuk mai." Ka tih chuan a nui huk ringawt.

"Thingpui ka lo in dawn chiah a, i lo thleng fuh khawp mai."

"Engtiknge in inneih hun tur kha?"

"Karleh khi a ni tawh, a hnai tawh khawp mai," ka tih chuan mitmeng danglam zet hian min en a, mahse a reh leh thuai a. A hmelah chuan lunglenna a lang thei hial a ni.

"Keipawh bialnu ka nei leh tawh asin, mahse nang ang em chuan ka duh lo," a tih chuan ka sen ap ap a.

"A va lawmawm ve, engtiknge in tihhuk ve dawn?"

"Ka hre rih lo, kan la inbelchiang lo em a, a la hla rih ang, chubakah pasal i neih hma ngeia hmuh che ka chak a, ka rawn kal vang vang anih hi."

"Nupui chu nei thuai rawh, i tar mai dawn ania, zu i in tawh lo em ni?"

"Ka in lohna a rei leh tawh. Ka hmeichhe hmangaih duhloh zawng chu tih ka tum tawh lo."

"Akim???"

"Enge?"

"Khatiang lam kha chu sawi tawh lul suh, nuam ka ti lo ania, Zomuana nen kan innei tawh dawn a, ka hmangaih a, ani pawhin min hmangaih bawk. I rilru tihnat ka duh lo, chuvangin beiseina siam sak che ka duh lo reng a ni. Ka țhian ang bakin ka en thei silo che a, min hrethiam dawn nia, hmangaih thei che ila ka ti lutuk asin, ka tana thil min tihsak zawng zawng avang khan ka lawm lutuk ringawt."

"Ni e, ka hria alawm, bakah lawmthu sawi kher a ngai lo, ka hmangaih tana ka tihtheih ang ang tih khan ka lawm fe zawk a ni."

"Kei aia țha daih hi i phu a ni. Zomuana hi tawngin hmangaih lo ila chuan nang hi pasalah ka nei mai thei che a ni. Mahse, min hmangaihna ringawt kha a tawk zo silova, ka damchhung pawhin ka hmangaih lo mai thei bawk che a, chuvangin kei min hmangaihna hi chu bansan hram ang che."

"Ka hrethiam alawm, chuvang chu ania, ka rilru putdan enge tih hriat ka duh avanga lo kal ka nia lawm."

Ka ngawi ta reng a, bialnu a neih thu a sawi bawk a, a bialnu chu hmangaih hlauh se ka ti kher mai.

Tlaiah ka nu leng lo haw in Akima a hmu chu mak a tiin a lawm hmel kher mai. "Aw haw, ilo kal a ni maw? I thlenna a rei tawh em? Iva reh ve a, min do ta emaw kan ti mai dawn asin," tia nui var var pahin a chibai vat a.

"Nia, ka lo thlenna a rei ve tawh mai. Khai a, nangni ber ka do che u chuan a tihchi nang mawle," a lo tithuai a.

"Enge ilo tih dawn a, nge i lo zin satliah mai mai?"

"Ka lo zin satliah chu a ni thova, inneihnaah te pawh kan tel ve ang chu, ha te pawh ka lo tat hriam hle tawh asin," nui hak hak chungin a ti a. Ka nu pawh a nui ve hak hak mai.

"Mambawih, thingpuite i intir tawh em?"

"Aw, a in tawh alawm, vawi engemaw zat a in leh tawh kha," ka tih chuan Akima'n, "Ka pi, dawt vek a nih kha, ka hman lo, in lo mai rawh min tihloh leh, lo inchhuan mai rawh a ti thul. Ka thleng chiah a, min tir nghal char char mawle!" A tih pah chuan nui sak chung hian min rawn siai zauhva. Ka nu lah chu a nuih a za em em a, a nui hak hak reng mai.

"Mama te pawh chu an va lo haw har ve mawle," ka nu'n a tih chuan an ni inkhel pawh an rawn lut ve nghal chiah.

"Inkhelh hi in atchilh lutuk a, inah engmah inti hman lo," ka nu chuan a ti hlak a.

"Aw, ka nu, engmah tihtur a awm hleinem," Sangtea chuan a lo ti vat a.

"Tihdan țha deuh ka hria, Sangtea nghah turin dawr siam ang u hmiang, Sangte, i peih ang em?" Mama'n a ti nghal zat a.

"Peih e a, ka chak lutuk alawm," a lo ti ve vat bawk.

"Awi, i naupan lai kha chuan i u nih ang ang kha i duh ve țhin kha a nia," ka lo tifiam vat a, an nui dar dar a. Sangtea erawh a tum deuh bar mai.

"Engpawh nise, Chhung inkhawm nei phawt ila, chaw kan ei dawn nia," ka nu'n a tih chuan kan bu nghat nghat hlawm a.

Țawngțaina kan hman zawhah chaw kan ei ta nghal a, Akima tan pawh inthlahrunna tur awm lo khawpin ka naute pawhin an be nghal bawrh bawrh mai. A hma pawha innel sa tawh tho kha an ni bawk nen.

"Kan in hi ala te deuh si a, ka u mami room luah rih mai la, ka u hi ka nu bulah mu mai rawh se," Mama chuan a ti zung zung a.

"Nia, a remchan phian chu," ka nu'n a lo ti vat a.

"Ni love, nula khum luah chu ka duh hauh lo mai, sitting room ah pawh a mut theih tho ania," tiin a țang ve sateh a.

"Kan room ah mu ve la han tih dawnin pahnihin kan ințawm bawk si a, duh leh ka khumah mu la, kei chu ka nu room ah ka mu mai ang,"

"Ni lo e, ka nu room ah ka mu mai ang e, pawi ka ti hleinem," ka lo ti ve vat a.

"Nia, pawi chuang lo. A țha vek alawm," Ka nu chuan a lo ti ve bawk.

"Kan ina riah loh i hlau bawk a, zanin ațang chuan i riak char char thei ta. A nuam lo i tih leh i thu thu a ni tawh mai." Ka lo ti vat a, ka chalah min la pen fawk zui. "Aiah, a na...!" Ka ti vak a, a la nui vur vur zui.

Chutia kan lo nuih bawk bawk lai chuan kawngka kik thawm ka hriat chuan ka va hawng vat a. Zomuana chu pawnah a lo ding reng a. "Lo lut rawh," tih pahin kawng ka kian a, a luh fel hnuah kawngka kharin ka zui lut nghal vat. Akima nen an inhmuh chuan chibai te an han inbuk ve luam a.

"Engtiknge i lo kal a?" tiin Zomuana chuan a zawt a.

"Vawiinah ka lo kal," chhanna a tawi țha tek tawk hle mai.

"In dam amaw? Kn inneih hmang turin em ni i lo phei a?"

"Umm, ni deuh tho mai. Ka țhiani te hi a ngaihawm ve reuh em a, ka hmu chak ve pah deuh mawle."

Akima'n min duh ani tih hi Zomuana'n a hre vek tawh a, a ngaihkawih loh hram ka beisei a ni.

"Thingpui kan lum ange," tih leh thawh ka rual a.

"Kan leng dawn em ni?" Mama chuan Akima hnenah a ti a.

"Pawi hleinem, leng ila a ni mai alawm," tih pahin an ding hluai a. "Kan rawn haw har lovang," tih pahin an inzui chhuak ta nghal a.

An inzui chhuak lai chu ngawi rengin Zomuana chuan a thlir zui reng a.

"Kei chu kan mu teh ang," ka nu chuan a ti a.

"Keipawh ka țhianpa hmuh lawk ka ngai," Sangtea chu a chhuak nghal vat.

Innei tawh mai tur ni mahila, ka nu leh ka nauten thil intihrethiam taka an inthiarfihlim hmak chu ka haw deuh rum rum mai.

"I chhungte chu an va fing ve a," nui suk chung hian a la ti zui. Ka sen ap ap mai.

Ka bulah a rawn țhu a, "Mama sawi kha enge a awmzia? Akima kha hetah a innghat tihna ami?" Min melh run lehnghal a, ka zam kher mai.

"Aw, ka rawn thleng dawn a ti si a, chutiang na na na chu hnar a nuam bik hleinem," ka lo ti vat a.

"A endan che hi ka hai bik lo asin, aduh che tih i hria em?"

"Hria e,"

"Hre si, engtinnge heta i awm tir theih zawk a, kan innei țep tawh tih a hre tho a ni lawm ni?"

"Akima hi ka țhian chauh a ni tih ka hrilh tawh che in ka hria. I thikthu hi ani lakah chuan i tihchhiat a ngai lovang. Bialnu a nei tawh alawm," ka tih chuan a ngawi ve ta hram a.

"Akima vang hian ka neih leh duh loh che i hlau em ni?"

"Hlau ang chu mawle, ka hmangaih che alawm, ka nupui inih hma chu ka ngaih a țha thei tawh lo tawp mai," nui ruh ruh chung hian a ti a. A hmel ka en chu ka thaw huai mai. Ka chum awk a, "Ngeiawm thiam lutuk mai," tiin.

Ka hmuiah a rawn fawp zauh a, "Zanin chu i bulah min riahtir ve mai la," ka beng bulah a rawn ti sa sa a. Ka nghawk sawk mai. Ala nui vur vur zui lehnghal.

"Teuh lo mai. Ka nu room ah ka riak dawn tlat. Lo mu lo mai rawh aw...!" Ka ti a, kan pahnih chuan in enin kan nui dun hak hak a.

"Umm, engpawh nise, kan inneih zan chu ka la nghak thleng thei em ang chu maw! Nangte hi dawithiam i ni ringawt alawm le."



@######@######@######@