MY VALENTINE'S - 15

Savage Atonement
    (Lh Varte)


Hk Renthlei



Eps - 16(Last)



Laurel chuan a flat thar kawngkhar chu a hawng rawk rawk a...kar ruk chiah a la luah a, Italy aṭanga a lo kir hnu a a luah thar a niin a hma ami ai chuan a zau ṭha ve hle a. Italy ah nipui chhung zawng hnathawkin a kalbo a, a hna chu lemchang ho producer lar tak hnuaia secretary a ṭan ani a, a nuamin an buai em em a, a khawhawi a tizau sawt bawk a. Duh se chu zantin tlangval lenchhuahpui tur pawh a hmu ngei ang, mahse mipa ho sawmna satliah chu a hnawl thiam lamah a ramṭang tlat thung a.

A vun chu Italy nisa a tuarna avangin a sen ve char a. A hmel inhmuam up reng ṭhin kha a bo tak avangin mite pawhin an enzui vang vang fo ṭhin tih a hrethiam ve thova. A bik takin mipa ho phei chuan an en duh zual hle ṭhin a ni. A hna chu a nghetlo a nih avangin contract thar ziak duh lovin a lo haw a. A pu chuan chhawr zui ala duh hle nangin a rilru a kim lo riau tlat a. Italy a awm reng chu a chak lo a ni.

Office buai tak pakhatah a thawk leh a. A thawhna hlui Marshall & Marshall chu a ngai ve thei hle a. A tana hnathawh tur an la neih leh neihloh a la zawt leh ang chu. Mahse Mr. Marshall khan tuna Laurel hi a lo la duh ang em? Hmana Laurel kha anna pakhatmah a nei tawh silova. A hmaa a mizia ang kha a ni tawh lova, mahni a inring tawk hle tawh a, a sam a thlah siau reng tawh a, a hmai chu make-up tlem tlem nen a chei ve ziahin a thawmhnaw pawh a thlang uluk thei hle a. Mahse a nunah chuan thil engemaw kim lo leh a nun tiruak riautu a la awm tlat a. Tlangvalte a lenchhuahpui in chaw a eipui ve fova, Oliver chunga a rilru putdan kha hmangaihna dik a ni em tih hriatchhuah a duh hle a. An han fawh chiah chuan Oliver a an ni lo tih a hrechhuak leh ṭhin in an fawhna chuan Oliver a fawhna angin a taksa ah engmah nghawng aneih ve ngai loh avangin a lo hmangaih hle a ni tih a inhriatchhuah zual tir deuh deuh a.

Thaw huai chungin a flat chhungah chuan a pen lut ta a. Party na a sawm a ni na chungin a tel peih lem loh avangin kalloh a thlang a. Darkar khat a liam leh chuan eitur inchhawp chungin TV hma ah hahdam deuh hian a ṭhu ta dar dar a.

T.v ah chuan milar ho kawmna an nei a, mipa sang deuh Camera hnungchhawn zawnga ding a hmuh chuan a ṭhu ngil ta zawt a. Chupa chu a rawn inher a, Camera chu a rawn hmachhawn ta nghal a. Thupuangtu chu a rawn ṭawng zat zat a. "Tuna kan mikhual tur hi chuan hmelhriattir vak a mamawh tawh lova... a hna hian a ti hmingthangin mitin hriat a hlawh tawh thova. Pi leh pute u, tun kuma Maundale prize dawngtu, lehkhabu ziak thiam Oliver Savage a nih hi, mipuiin kan lo hriat lar dan zawkin Jonathan Greaves a ni," a rawn ti lauh lauh a.

Laurel chuan a lo en ngawih ngawih a, a chaw eitur reng reng a hrechang tawh lova. Oliver chuan kamis a ha a, a lang pa in a inhmeh hle a, TV a kawmtu nu pawh chuan ṭha a ti ve s ni ngei ang, ṭullo zet zetah a ban a va tawh sak a, a mita enin a nuih var var reng a. Laurel chuan a lo thik hle mai a. A hmel ringawt a lo en avang chuan an thu zawh leh a chhanna pawh a lo ngaithla chang lova. Oliver hmel chu a dul hle in a lo hria a, a hmel pawh an awmdun lai ai khan hriam deuhvin a hre bawk a.

"I lehkhabu thar chanchinte min lo hrilh la," zawhna zawttu chuan a han ti a.

"Ka hrilhfiah vek thei lovang che u tih ka hlau khawp mai. Ka sawi theih chin chu thil engemaw ziah ngei ka duh leh ka mamawh em em a ni tlat a ni," a lo ti a.

"Mahni chanchin ziak te pawh i ang lek lek alawm," tiin dilchhut tak hian a lo zawt leh a.

"Ka ni a nih pawhin a thawhtur angin keimahah a thawk ta tlat lo a ni," Oliver chuan a lo tihsan leh then a.

Thu eng engemaw ala zawt zui ṭeuhva, Oliver chuan tawi fel takin a lo chhang zel a; chutah midang an kawm veleh ta a. Laurel chuan Oliver a hmel lo lan leh beiseiin a tawp thleng a en tluanchhuak ta zak a.

Chupa chu a hmangaih a, a hmangaih fo zel dawn a ni tih a inhrechiang ta hle a.

Dawr lianpui neitu hnuaiah Secretary thovin a inhlawh a, hnadang, a thawh chak zawng ala hmu rih lova, pawi pawh a ti lem lova. An thawhna dawr chu a lianin a thawk te pawh an buai thei em em a. Nikhat chu a haw lamin lehkhabu awmna lamah a kal a, a enkual ve dan dan a.

"Hei hi Jonathan Greaves lehkhabu thar a nih hi. Ka lei ve hrim hrim ang. Tv ah khan ilo hmu ve em? Ṭha ka ti lutuk kei chu," a lo ti nghal zung zung mai a.

Laurel chuan lei leh chhiar chakna phei chu a nei hauh lo nangin lehkhabu dawr lam kawngah chuan a kal ta fova. Nikhat chu chhunchaw ei turin a chhuak a, dawr vel chu a lun hle mai a, Oliver lehkhabu an pho lanna bul vel chu mipui hian an lo bial lut lut mai a. Ava en hnaih deuh chuan a chhan chu a va hmu rang hle bawk a.

Oliver ngei mai chu chulaiah chuan a lo awm ve a lo ni a, a lehkhabu leitute chuan a hming an lo ziahtir luai luai a. Bing chuk chuk chung hian Laurel chuan a lo thlir reng a. A thinphu a rangin a thaw hlawp hlawp mai a.

A awm ve tih a hre lo tawp anga, lo thlir ve chu a pawi lovang chu ti rilru chungin a mit rawp zet chuan a lo en reng a. Chutah Oliver chuan a rawn melh zawk a hriatna a nei a, an mitmeng chu a intawk ta siah a, a pumin a nghing nghal dawt mai a. Oliver chuan a awm ve tih a hre hauh lovang, hmuh pawh a rawn hmu tak tak lovang ti rilru chungin hmanhmawh zet chuan a kalsawn ta dawr dawr a. Hriat pawh a rawn hre zui tawh kher lovang, a lehkhabu aṭang mai lo phei chuan, a mimal nun aṭang chuan a paihbo daih tawh ang chu. A phuba lak tum ve na atthlak lutuk avang chauh khan ṭhian ang tal pawhin an inṭhen ta silova. Kha thil a lo ziak kher kher kha naupan chhiat thlak hle in a hre ta a.



**************



Christmas a lo hnai a Laurel chuan inpuahchahna chi hrang hrang chu phur lem lo chuan a ti ve zel a. Amah ang bawka mahnia inluah ṭhian anei nual a....Christmas hmanpui tur pawhin an sawm sap sap hlawm a. Mahse a phur lemloh avangin tumah tiam nghet a nei duh lova. Chawlh hmang ni pah fawma zin khawthawn te a rilruk deuh mai mai a. Chanchinbu ah chuan Oliver an Switzerland ram lama Christmas hman a tum thu an ziak chei chuai a, hmuh leh a chak em em rualin a awmdan chu a thup theihloh a hlauh avangin hmuh loh chu him berin a ring a.

Christmas hma karthum lai a la awm tih chuan Card pakhat, Dorset dakin aṭanga an rawn thawn chhuah hi a dawng nawlh mai a. Marshall aṭangin an rawn thawn chhawn leh a ni a, makti deuh tak hian a han hawng a, Elizabeth rawn thawn a lo ni a, mak a ti zual sauhva. Oliver hnen aṭangin Marshall ah a thawk tih a hria a ni ngei anga, a hna ngaiah a kir leh nghal a ring tih a hriat reng bawk a. Marshall kha va be pawp leh lo phei sela chuan an ni pawhin a address thar chu an hre bik awm tawp silova.

Lehkha ip chu a han hawng a, lehkha them a lo tla tel zauhva. Kumthar hmang tura tlawh turin sawm a lo ni a, kal ngei tura an beisei thu leh party an buatsaih chu chhim ngei tura a duhthu a rawn ziak tel a.

"Oliver a hmuh palh a hlauhawm lovang. Switzerland lamah a kal daih a, hmuh leh che ka chak a ni," a rawn ti kalh bawk a.

Ani pawhin hmuh leh chu a chak ve thova, Oliver hming a lam ri hriat ringawt pawh a thlahlel a ni si a. Hnial chu a finthlakin a him zawkin a hre nangin pawm mai a duhna chuan a nawr ut ut a. Oliver hnaih tute bula awm chu a thlahlel ve thova. Oliver ber a awm dawn lo bawk a, a hriat chak zawng eng engemaw te an lo hrilh anga, unau inhnaih tak te inkara boruak kal vel te chu a hre chak reng reng bawk a.

Kal ngei chu a ti tlu ta nge nge a. Phone in Elizabeth chu a bia a, ani chuan an awmna hmun chu a lo hrilh thuai thuai a. "Kan in chu nuam i ti lo mai thei ania, mahse kan pa te chhungkaw ro ani ve a, nin thut chang ka ngah ve lutuk asin. Mahse tunah chuan ngaiah ka neih ve tawh a. Ilo kal thei tur chu ka va lawm em, Laurel. Kan hmu chak tawh lutuk che ania," a rawn ti ta sauh sauhva.

Laurel chuan party na a hak tur kawr thar a in lei a, inhmeh hle pawhin a inhria a. To hle mahse Christmas kawr lei a khat em a, a inthiam ve thova.

Dorset a panna kawng chu nuam a ti hle mai a, kawngsira chaw dawrah chhunchaw a ei a. Dawr lehlama zu dawra mipa rual ho chuan an lo en duh hle mai a, a en duh lo lui tlat nangin hmana mipa a hlauhna ang kha chuan a hlau tawh hauh lova. Oiver zara chutianga a nung thei ta chu a lawm hle bawk a.

Chawhnu her zetah Elizabethin a hrilh in chu a thleng ta a. Lunga sak, inhlui tawh zet leh lianpui hi a ni a, enkawl ngun tih hriat tak hian a lang faiin a bul vel huan te chu a mawi hle mai a.

A car thawm an hriat rual chuan phir te chu an lo tlanchhuak nghal a, an rawn ri nghal chel chul mai a.

Rick pawh chu a lo chhuak ve nghal a, a thawmhnaw a khaisak lai chuan a hmelṭha tak chu a sen ṭan ṭan a. Kum reiloteah a pu Oliver chu ala chhun hle dawn niin a lang, ala naupang em mai pawh a.

"Lo lut nghal rawh," tiin Elizabeth chuan a rawn kuah a. "Graham chu nau chhar turin an rawn ko thut a, a kal chhuak ta anih kha!" A ti bawrh bawrh a. Inchhung hmanlai zet leh fai nuam takah chuan an inzui lut ta nghal a.

"Hnawk hle mahse in a ni miauva. Hetiang reng hi chuan kan hnawk ngai bik lo ania, Laurel. Kan in enkawl tu nu hlu tak mai a zin bo lai a ni hlauhva," a ti zung zung mai a.

"Chuti chu ka theih ang angin ka lo pui ang che. Mikhual dang beisei ila nei em?" Laurel chuan a lo ti thuai a.

Phir te chu an in en he haw a, sawi tum engemaw an nei niin a lang a, mahse Elizabeth chu a rawn inrawlh thuai a. "Er....Ka la chiang mai rih lo. Enteh, i pindan turah ka han hruai phawt ang che. Jane chu a ṭhiannu nen an riak dun a, an pawhṭhen theih rih lo a ni. A Cycle thar hmuhtir a chak em em bawk si a, ka ngaihtuah viau ṭhin nangin engmah pawi an tawh ka ring lova," a ti ta duah a.

Laurel chu pinda fai leh nuam takah hian a hruai lut ta a. "He in hi Pastor in a ni ṭhin a, kan pa pu pu leh hi pastor a ni a, helai ram hi kohhran ho hnen aṭangin a lei a, chuta ṭang chuan an chhungkaw inpui a ni ta reng a ni," Elizabeth chuan a ti malh malh a.

"A nuam ka ti lutuk," Laurel chuan a lo ti thuai a, tukverh aṭanga ram zau tak lang chu a thlir vang vang a.

"A nuam ve ṭhin hle asin. I bungrua kha phawrh la, thingpui ka lo lum ange. Zanin chu tumah mikhual dang kan nei lovang," a lo ti ta thuai a.

"I party buatsaih turah chuan tihtur i ngah viau lawm ni? Puih theihna che ka nei ang em?" Laurel chuan a lo ti zui vat a.

"Ih....awle, engkim ruahman vek tawh ania, mahse London party lian boruak ang a ni ve dawn lova, henglai vela chengte hi chuan tihdan bik te kan nei a," tiin a kalsan ta daih a.

A thawmhnaw te a phawrh a, a khai fek zawh hnu chuan inhnuai lam a pan thla leh nghal a, in neitunu chu amah chauhvin ṭhutkhawmna pindan nuam zetah chuan a lo awm a.

"Lo ṭhu la, i chanchin min han hrilh teh. Hmuh tur lah chu i awm ngai der silova," tiin a lo nui sang a.

"Ramdangah hnathawkin ka kalbo daih alawm," tih pahin thingpui no chu a lo la a, a kut lehlam chuan ui lianpui leh fai zet lu chu ngaihtuah miah lo hian a chul sak hauh hauhva. "A hahthlak viau nangin nuam ka ti khawp mai," a lo ti a.

"I nunphung i thlak danglam thei ta anih chu...Oliver chu a lawm ngawt ang. A ngaihtuah hle che a ni.," Elizabeth chuan a lo ti charh charh a.

"Ngaihtuah ka ngai reng reng hleinem," tiin a hmel chu Elizabeth hmuh theih loh turin a kun ta daih a. A hming sawi rik ringawt pawh chuan natna leh phurna a neih kawp tir a, theihnghilh a duh em em, ala thlakhlelh fo ṭhin te chu hnaih leh ta sauh hian a inhria a.

"Ngaihtuah lo tur che chuan nangmah ngeiin i hrilh a ngai, min rinhlelh loh nan. I tlanchhiatna hmanrua ka nih avang khan ka chungah a lawm lo teh asin!" Elizabeth chuan a lo ti ro halh a.

A thuhriat chuan a tihlim rilru hle mai a. A langah erawh chuan a tûm lui bar bar a. "Ka kalbosan ta thut khan a thil enchhinna beih lai a tibuai mai...."

"I hmangaih avangin kalbosan i duh a nih kha. Thil awm tak phei chu a ni ve thova..." Elizabeth chuan a lo ti dam thlap a.

"Ka nunhlui avang khan maw?" Laurel chuan a lo ti let vat a. Chu nu bulah chuan zak miah lovin thu a sawi thei zel chu a lawm hle a. "Keipawhin chutiang chuan ka ngai ve tho ṭhin asin, a chunga ka rilru put kha naupang chhe rilru ah ka ngai a. Ka hmuh hmasak ber ṭum khan Court case a zawhfel hnu lawk kha a ni a, ka ring nghal mai a. Pa fel leh mi khawngaih thei tak hmel a pu in, min hriatthiam hmel em em bawk a. Chutah ka rinloh ang zawng tak maia min han tihmualpho takah khan ka haw ta em em mai a. Kum ruk chhung zet chu ka thinlunga amah ka huatna kha a in up a, a thi thei tlat lova, ka pahrawn laka ka thinurna leh ka huatna neih zawng zawngte kha amahah ka bel a, mahse kan han inhmuh leh s, a thiltihsual avanga hrehawm a tihzia te, min zawn dan leh min puih a inpeih zia te ka han hmuha, ka han hriat takah khan ka ngaihtuahnaa mihring sual tak kha a takah chuan a lo ni ta hauh lova, ka hmangaih ta hial a ni," Laurel chuan a ti ta malh malh a.

"In dinhmun a inang thei ang tih rinna i nei reng em? I rilru ang a put ve i ring em?" Tiin a lo zawt leh a.

Laurel chuan a lu a lo thing a. "Engtinnge chutiang a thlen theih ang? Oh, min khawngaih ve hle tih chu ka hria a, mahse a tan chuan thil nung satliah, a tana ṭangkai tura a zir leh a hman ang chauh ka ni," a lo ti ta hmak a.

"Mahse hmangaihna a chenpui tho si che a," Elizabeth chuan a lo ti leh hram a.

"Ka sawi tawh ang khan. Hlauhna min tuam tlat tu kha ka la neih leh neihloh min enchhinna mai mai a nia lawm. Mimal thil a tel lo. Enchhinna vek a ni, enchhinna vek," a ti ta tawn tawn a.

"A lehkhabu thar kha i chhiar tawh em?" a lo ti a.

Laurel chuan a lu a lo thing a. "Lei ka tum a, ka rilru ka thlak leh ta thut a. Switzerland ah chuan a la awm reng em ni? Ala awm ka ring ringawt a," a ti ta hluai a.

Chu zawhna chu zawh kher a ngaih loh tehreng nen, mahse an chanchin an sawi zel chuan kumthar nuamti deuhva a hman loh phah a hlau ta riauva.

"Christmas chu a hmang ngei alawm. Car thawm ka hre tlat mai. Graham a ni tawh ang ka ring," tiin tukverh lam chu a pan a, Laurel chuan a lo it ru hle mai a.

Reitak innei tawh si, fate an neih duah tawh hnu pawha a pasal ala thlahlel viau mai chu, nupa hlim tak an ni ngei ang. Pasal a la nei ve ang em? A ring lo zawk mah mah a.

Graham Turner chu pa kawmnuam tak a ni tih a lang reng a, a nupui nen chuan an inawm hle a ni. "Phir an nia, i awih em?" Tiin a nupui lam chu a hawi a. "Derek chu a hlim hle a, mahse a buai ve hle dawn a ni. Moira chu a tuarchhel reuh hle asin. Naute pianghlim han hmuh te hi a nuam ve hle a ni. Enge zanriah lam te?" tiin a nui var var a.

Elizabeth chuan nui chungin Laurel chu a rawn ner khum zauhva. "A hna hian a thil eituina hi a dal chuang miah lo ania. I tuitih zawng ber mawle, choka lam pan ka ngai ta tihna a nih chu," a ti nghal thuai a.

Zanriah eilai chuan Laurel chuan chu mite chhungkua chu a enthla deuh reng a. An hlim thawm chuan inchhung chu a ti nuamin a awt ve hle a. Phir te chuan Rick-a bialnu chanchin an sawi tui hle a, pa ber chuan an ti lutuk tur alo khap zauh zauhva, an zinga telve reng ang maiah a inngai hial a.

Chaw an eikham chuan thleng silna turah thleng a dah pui a, phir te pahnih chu an pa ber hovin an lo titi thung a.

Table Tennis khel tura an kal tak hnu chuan Elizabeth chuan a rawn en a. "I chau hnawk lo maw?" nui chungin a rawn ti a. Laurel chu khelh puiah an sawm ve nangin a chauh deuh thu in a lo chhang a.

"In lianpui ṭhat ve na chu, an duhzawng ti a ninhleina tur a ngah alawm. Thil dahṭhat nana an hman ṭhin pindan lianpui a awm a, an infiamna atan kan siam sak a....khawlaia an leng tur a veng a, a ṭha khawp asin," a ti zui mawlh mawlh a.

Boruak thianghlim vang nge chuti taka a muttui a inring pha hauh lova. Hnar vawt zet hian a kiu ah chuan a lo nawr sek sek a, a han en chuan ui lianpui chuan mei hem vut vut chungin a lo kaitho hi a lo ni a.

"Susie, naupang sual tak i ni," tiin Elizabeth chuan kawngka aṭang chuan a rawn en a. "A pawi hle mai, Laurel," tiin thingpui no a rawn chawi a. "Mahse Susie hian mikhual vengtu bik niah a lo inngai ṭhin a, ka dan hma in a lo tlanchho pek a nih hi. Chunglama a chhoh hi kan phal ngai lova," a rawn ti nghal thuai thuai a.

"Heti chena rei hi ka lo muhil amaw?" Darkua a lo ri ṭep tawh a. Turner chhungkua chuan engtinnge an ngaih ang?" a ti rilru a.

"Pawiti reng reng suh. Dik tak chuan maw, keimah hi ania ngaihdam dil zawk tur chu. Vawiin hian ṭhianhlui hmuh tur ka nei tih ka lo theihnghilh daih a, Laurel. A pawi ka ti lutuk tlat. School a ka ṭhiannu ania, kan intlawh tawn fo ṭhin s. Ka ṭhulh leh tih ka hrilh thei...."

Elizabeth chu a inthiamloh hmel em em mai a, Laurel chuan a lo khawngaih a. "Ni love, i ṭhulh thei lovang, ka lo awm ve thei lutuk alawm. Party na tur atana lo in tihfelna hun te ka nei anga, enge ka lo tih ang?" Laurel chuan a lo ti thuai thuai a.

"Ih...Ni e....ni e, engmah ngaihtuah buai tur a awm lo, mahse kalsan che chu ka hreh zawk a ni, a pawi i tilo tak tak amaw?" Elizabeth chuan a lo ti nawk nawk a.

A ṭhiannu chu Bath a cheng a ni a, an chhuahsan hma loh chuan an lo kir leh har ting mai tih a sawifiah thuai thuai a, Graham chu a kal ve dawn bawk a, chawlh a nei khat hle a, a nupui bula kalve a chak thu a lo sawi ve thuai a. Tukverh aṭanga ram lang duai kha Susie nen an fang dun thei ang chu. A han sawi chuan Elizabeth chu a lo meng phar chiam a, hlauthawng hmel a pu bawk a.

"Oh, nilo...chutiang chu....ih..." a ti nawk nawk mai a. Laurel chuan enge a sawi hreh em em chu ni ang tiin a lo ngaihtuah a, tun ṭumṭ Elizabeth a hmu leh chu a mizia a mak riauvin a hria a.

"Khaw awmdan chin hi sawifiah theih a ni lova. Boruak hi a vawt thut zel a, kalchhuak rih lo mahla a pawi lovang," Graham chuan a lo ti dam thluam a.

Khawpui nula zeilo deuhvah an ngai a ni ngei ang, Mahse an remti lo chung chu a chhuak chak bik lova. Thil engemaw tihtur a lo hriat ve mai tur thu a hrilh ta zawk a. Naupang ho T. T a khelhpui mai ang chu;

An nu leh pa te an liam ta maw tih veleh an ṭhiante hmu turin an chhuahsan ta vek a. Rick lah chuan a ṭhiante hmuh a tiam thu a lo sawi hmasa ber a, phir te chuan a bialnu hmuh a tum thu an lo sawi a, ri chel chul chungin an tlanchhuak zo ta vek a. Susie nen chuan an awm ta ran a.

A inbual anga, a tin te tifaiin a hnawih ṭha anga, nite chu a hmang liam ve mai ang chu, tiin bualin a pan ta nghal a.

Inbualna kuang aṭang chuan a chhuak a. Fai ṭha hle in a inhria a. Pawna car ding thawm chu a han hria a, Graham te nupa lah chu an kalna ala reilo hle si a, tuemaw in doctor an mamawh a nih a ring ta thut a. Hman hmawh zetin a robe a ha a, inhnuai lam a pan ta nghal a.

Kawngkhara chahbi inhawlh ri a hriat chuan a ding chawt a, kawngkhar kalhna chu a rawn che a, Susie lo phe sek chu kawngka kau rual chuan a zuangchhuak ta nghal a. Laurel chu a thin a phu dawt dawt mai a.

"A tawk e, Susie, ui sual zet i lo nih hi!"

A aw hriatṭhan zet a han hriat takah chuan Laurel chu a khawng nghal awt a. Oliver a lo lut chu a lo en reng ringawt a. Kekawr dum leh savun jacket a ha a, a sangin a lang lian hle a, khua a vawh avang chuan a jacket nghawng chu a pawt tung bawk a. A sam chu tan a ngai tawh a ni, mak takin a rawn hmu chu makti hmel a pu tlat lo bawk a, engthil emaw tak, a hriatthiam loh chuan a mit chu a kap de sar a, a de zauh zauhva, Susie lo zuan huam huam chu zawitein a nem sawn a. "Hello, Laurel," a rawn ti thawp sat a.

"Switzerland ah i awm emaw ka ti a!"

A aw chu a chiang lo riai a. Ban chu a vuan ṭang ṭang a, a ke khur nasa lutuk chuan a zolo ṭepin a hre hial a.

"Ka hria alawm, i lut ang hmiang?" Tiin a rawn melh nghek a.

Laurel banah chuan a rawn kai a, a robe hak chhana a kut tha chak zet chu a lo hre thei a, a kawr var tak chhanah chuan a lang hang hle mai a.

"Hmuh i harsa hle mai," tawi tuka tih pahin kawngka a khar nghal a.

Laurel ka chu a lo ro zo va, a lei hmawr chuan a hawl zai zai a, Oliver an a lo en reng avang leh a mitmeng lo thim zual sauh a hmuh chuan a lo khur nasa zual sauhva.

"Ka...min zawng tih ka hre hleinem," a lo ti tham chal a.

"Oh Come on, Laurel," ti el aw zet hian a rawn tihkhum a. "I hriat reng kha. Thil sawifel tur kan nei tih i hre reng a lawm!" a ti a.

"Ka thil ziah kha i sawi a nih chuan," a han ti ṭial riai a, "Ka tisual nasa a ni....ka inhrechhuak leh nghal thuai a. A tir kha chuan ka hua che alawm, ka inhriat...ka tum angin ka awm dawn lo tih ka hrechhuak leh ta thuai a, khatiang thil kha i lakah ka ti thei lovang tih ka hrechhuak leh thuai a...ka..."

"Tichuan min lo haw ta lova maw?" dilchhut hmel fahran hian a rawn bih hnai sauhva, a rawn en dan chuan Laurel marphu chu a lo ti rang nghal zaih zaih a.

A inher a, dawhkan chu a en ringawt a, a lehkhabu ziak thar ber lo awm reng a hmuh chuan mak a ti hle mai a. A la kang a, Oliver an chik zeta a hmel a lo en reng chuan a awm a tinuam lo hle bawk a.

"I chhiar tawh em?"

A lu a lo thing ringawt a.

"Chhiar la ka ti hle asin, mahse tunah chuan ni rih lovin. Kan titi dun hmasa phawt anga.. Engvanga tlanbo daig nge i nih a, Laurel. Vawikhat mai pawh a ni lo lehnghal. Lehkhabu dawrah khan biak che ka duhthu rawn hriattir che ka tum a, mahse ilo pilbo leh hman daih a," Oliver aw chu a chang viau nangin tawrh nei a ang hle a.

A lo hmu ve ngei a lo nih chu, rawn biak pawh a lo duh ni rengin!

"Enge kan sawi ang? I thil enchhinna i duhtawk tawh a nih ka lo ring a. Hmeichhe pangngaia min chhuahtir i tum thu kha i sawi ngei a, i..."

"Eng enchhinna maw? Eng thil tehlul nge i sawi leh tak?" Vin zet hian a rawn ti khur khur a. Chutah a hmel chu alo danglam ta thut a, a mitmu chu a dum zual sauhva, a de sar sar mai a.

"Oh, Lalpa, Laurel, Saruak deuh thaw a vahkual vel a ngai em ni? Kha i robe hnuaiah khan engmah dang i ha lo tih hre reng chungin rilru fim pu thei turah min ngai amaw? Khawih che ka chak zia hi i hria em? Tun thla kalta chhung zawng zawng ka ngaihzia che i hre lovang chu tiraw? Ka hmangaih che asin. Pathianin min ngaidam sela, ka sawichhuak miah lovang chu ka lo ti a, ka hnena i lo kir leh theih nana sawi ka ni lo, ka insum thei ngang lo a ni, ka khawih lo theilo che ang bawk hian ka hmangaih che a, chu chuan min tichhe mek a ni," tih mawlh mawlh pahin a rawn kuah nghet sauhva, duhthawh em em hian a rawn fawp ta ngawr ngawr a. Chutiang ema Oliver an a mamawhna a la tih lan ngailoh avang chuan mak a lo ti rilru hle a.

Lungawi zet hian a hmui a lo ti kauva, duhthawh leh phal em em hian a lo inpe thlap a, a lo thlakhlelh em em chu a lo thleng ta a ni, a lo hnaih leh sauh sauhva, a kut chu Oliver kawr chhungah zen lutin a vun mam leh lum thur thur chu a chul ta hauh hauhva.

"Laurel, eng rilru emaw tak i pu a nih loh chuan hetiang hian min chhang let thei lovang," tiin a rum hawk a, a nem sawn deuhva, a rawn en reng a.

"Ka thei lo ang maw?" tiin no zet hian a lo en let a, Oliver chunga thuneihna a nei thar ta chu a lawm em em a. A lo hmangaih ve reng a nih chu.! Awih harsa a va ti em.!

"Laurel.!" Oliver aw ah chuan vauna leh ngenna a lo lang a, chutah Laurel zawk chu a chesawn hmasa ta a, Oliver chu a hnaih sauhva, a kawrhma kilhna chu a phelhsak nghal mawlh mawlh a, a taksa lo lang chu nghengin a fawp ta riai riai a.

"Awle, tisa thil taka intih phurna chu a ni ngei a, mahse a tihtir tu che thildang a awm ngei ang," thum zet hian a rawn ti ta a.

Laurel kuahna aṭang chuan a tawlhsawn a, a thlan a lo bawl ṭawk ṭawk a, Laurel chuan duh lutuk hian a lo en reng a, a hlim lutuk chu a hnuk a ulh ṭeuh mai a.

"Oliver, tisa thila phurna chauh chu a ni lo reng a ni. Ka hmangaih che alawm, nasa takin. Chuvangin ka tlanbosan ta che a ni. I lehkhabu atana min hman i duh vang chauhva khatianga min awmpui ṭhin kha i niin ka hria a, ka tuar thei ta lo ani. Laurel aw chu a khur dar dar a, a mitmeng lian kel kawl ah chuan mittui a lo tling ta pam a.

"Pathian leh!" tiin a lo rum hawk a. "Hun kan va khawhral hnem tehlul em! A tirah kha chuan ṭanpui satliah chauh che kha ka tum a...ka inrin tir dan ania. Lo hrethiam hram rawh aw, Laurel. Kum ruk chhung ngawt kha i chungchanga ka thuchhuah diklo avang khan hrehawmnain ka khat a, ka zawng nasa em em che a, ka hlawhchham der a, chutah ka han hmuhchhuah meuh che chuan ilo danglam nasa in ilo piangsual lo chauhva, min haw em em bawk si a. I thinlunga hmana min rinna ang kha nei let leh la ka duh ta em em a. Mahse ka thiltih tum chuan keimah min tibuai ta zawk a, enteh, Laurel, kan inhmuh hmasak ber ni aṭang khan ka thinlungah hian hmun i luah tawh tlat nia hriatna ka nei ta a, thil engemaw, nei tura ngaih ka nih hauh loh chu i lakah ka nei tlat a, chuti nilose kha aia nasa daih khan i chanchin kha ka ziak ngei ang. Ka nu pawhin min zilh fova, ka ngaithla duh lova. Petera ang maia ka awm ve tura inngaihna nasa tak ka nei a.

Khatih laia ka rilru buai theihzia kha tuman min hriatpui lovang, ka thiltih kha chu ngaihdam theih a ni hauh lova, mahse Petera thihna khan min tibuai nasa em em a, chhan hman a ni lo nangin thi lo se ka tihna chuan chhan dang dang min dap tir a, chutah i chunga ka thiltih dikloh zia ka han hriatchhuah takah phei kha chuan Petera ai kha i rawn awh a, zantin ka mumanga min tihrehawmtu i ni ta ani. I hmel hlauhna a khat te, thlabar leh puitu ngai ngawih ngawih hmel te khan englai pawhin min tibuai ta a, ka mumang lamah pawh ka hmu ta reng mai che ani," a ti a.

"Kan inhmu leh ta a, i tana thilṭha tih ngei duhna ka nei a, mahse keimah leh keimah ka indo reng a, ka rilru ṭhenkhat chuan i awmdan aṭanga zalen tir che a, zalen taka kaltir che ka duh laiin lehlamah ka thikthu a chhia in ka inti thu hle mai si a...ilo ṭha chhuak a nih pawhin mipa dang tan nilo, keima tan chauh ka duh tlat che a ni. Ka hmangaihna che chu hnarbo ka tum a, hrilh che ka duhlo mai nilovin i hriat ka hlau em em a. I duh thlang theia chhuah zalen che kha ka bat niin ka hre si a, nun hlim tak chen ve tura ka duh lai che pawhin min thlauhthlak ka hlau ru em em a. Ka thikthu lah chu a chhe nasa mai si a, Chas kha ka laka i pek theihloh i pe phal bik niin ka ngai a, i bul hnaia ka awm chuan khawih che ka chak em em zel a, hnaih reng che ka duh laiin ka hnaih ngam silo che ani. I taksa khawih tur chuan insum theihna ka nei hram hram thei anga, mahse ka hmangaihna che chu ka dang zo chuang lova. I ngaihtuahna ah chuan i pahrawn emaw min ti tlat si a!" a ti ta a.

"Ka mumangah ka hmu fo che alawm. Nangman min lo khawih a, ani kha ni lovin....," tiin Laurel chu a lo thaw ham ham a, a inpuang ve ta nge nge a. "Ka...ka mumanga min lo tawh ṭhinna chuan min tihlau hauh lo, nuam ka lo ti em em ṭhin zawk asin, i hrethiam em? I thilziah kha hmu lo ila chuan Chas pawh kha ka zui lo tawp ang, kha lehkha...."

"Eng lehkha ziak maw?"

Laurel chuan a khuma a lehkha dah, a lo chhiar ruk kha a han hrilh chiang a, Oliver chu a lo thaw huai a.

"Laurel, khang thil kha nangmah vanga ka ziah chu a ni ngei a, mahse ka rilru ka ziahna zawk a nih kha. Ka ziah tal loh chuan ka sawichhuah a rem silova, min chhawk ve hle ṭhin asin. Lehkhabu tam tak ka leiin ka chhiar tih i hria anga, ka tana ṭangkai tur ka zawng zawk a, ka hmangaih em em che a, mahse kan rilru a lo inhmu lo em a nih kha. Min ngaidam thei ang em, Laurel?" a ti ta a.

"Nangmah i in ngaidam ang tih min tiam phawt la. Mihring, thil tisual thei ṭheuh kan ni a, khatih hun laia i rilru tur...."

"Chhuanlam tur te chu min zawnsak chai lo mai teh, Laurel. I hmangaihna dawng tur hian engmah phutna che ka nei lo. Ka lehkhabu ziak thar ber hi chhiar la, ka hmangaih zia che leh ka hrehawmzia chu i hrethiam mai ang, i laka ka thil tihsual te, ka hmangaih che tih ka hriatchhuah hnua ka tuarna te ka ziahna a ni a..."

Laurel chuan ngawi turin a kutin a hmui chu a lo hup sak a, Oliver hmelah chuan hlimna chauh lang se a duh a.

"A tawpna a hlimawm em?" a lo ti thawp sat a.

Oliver chuan a rawn enchhuk reng a, chutah Laurel chuan a lo nuih ta saih a, a mipa hmangaih ngei hmel kha a rawn pu leh ta a.

"A tawpa hlimna awm hi ka duhdan fo ani alawm," tiin a rilru hlimlohna leh inthiamlohna te chu a lo reh tial tial a. "Tunah hian a tawpa hlimna awm chu chen nghal mai ka duh asin. Engtianga rangin nge min neih ang? Elizabeth hian awlsam taka min kaltir chu ring duh suh. Helaia lo kal tura sawm tur che pawhin buaina a tawk tam hle ania," tiin a lo nui hawk hawk a.

"Elizabeth chuan min hmangaih anih a rin thu a sawi a," Laurel chuan a lo ti sap sap a.

"Hah, ka thiltih dan zawng zawng kha a hria alawm...ka farnu luhlul zet hian i naupan lai pawh khan i laka ka rilru putdan hi a lo hrethiam tawh a ni mahna. Ka laka i rilru putdan a dang bik lo tih a sawi fova, mahse ani sawi nilovin nangma sawi ngei hriat ka duh ania, honey. Ka lakah hian eng rilru nge i put chiah han sawi teh," tiin a rawn zawt a, a aw chu ngaihthlak nuam a lo ti hle mai a, Oliver chuan mamawhna leh duhna a khat hian a rawn en a.

"Engkim i ni, Oh, Oliver, ka hmangaih che asin," a lo ti let halh halh a. Oliver an a rawn fawh leh takah chuan a lo kuah nghet ve sauh sauhva.

"Province ah ka hruai leh thuai duh che ania," tih pahin Laurel robe hak chhung chu a zen lut nghal a, a hnute lo ṭang alh chu a hupsak a, "Tun ṭumah chuan ka nupui angin ka hruai tawh che anga, ka khumah kan mudun tawh ang," a ti thawp sat a.

Laurel chuan lungawi em em leh thlemna hlira khat mitmeng hian a lo enchhova. A nghawnga kuahin a fawp tur chuan a dingdihlip ak ak a.

"A rei ang em?" a han ti sa sa a. Oliver lu chu a kuaikun a, "Reilo hram se ka ti," a ti leh sap a. A hlimna chuan a tilang hmelṭha zual sauhva, damchhunga a tawn ve phakloh tura a lo ngaih mipa diktak hmangaihna chu chhanglet turin a rilru leh a taksa chu a lo inpeih thlap a. Oliver an a rawn kuah ngheh tak sauhvah chuan lungawi em em hian a lo thaw halh a.

"A rei lovang, a reiloh ka beisei," thawp sata rawn tih pahin a pawm kang nawlh a, inchung lam a panpui ta nghal a.

Lei vanram chu chendun turin rilru inhmu taka in en rengin an in nuih var var a, chutah an infawp ta vawng vawng a.




THE END.



********LhpiecesRenthlei********